علم النفس ديال الألوان

كانسمعو بلي الألوان تقدر تأثر ليك على نفسيتك.

ليوما ختاريت اللون الأصفر باش ندوي ليكم على علم النفس ديالو.

الأصفر من أكثر الألوان اشراقا و اللي عاطي للعين وكايجذب الانتباه بسرعة وفالمعنى ديالو كايعني الفرحة والإيجابية. هو اللون ديال الشمس والضوء والابداع. وعندو تأثير على الجهة اليسرى من الدماغ اللي كاتتم فيها عمليات عندها علاقة بالمنطق و الرياضيات.

علم النفس الخاص بالألوان كيقول بلي مجموعة ديال الألوان قادرة تستحضر مجموعة من الأحاسيس وقادرة تأثر على السلوك ديالك حتا هو ولكن الأصفر عندو تأثير أكبر من أي لون أخر.

علم النفس ديال اللون الأصفر:

الأصفر لون مشرق ومعروف بلي هو أكثر لون كايعيي العينين نظرا للكمية الكبيرة ديال الضوء لي كايعكس.

أنك تستعمل هاد اللون فالخدمة ولا فشاشة الحاسوب ديالك غايأثر ليك بشكل سلبي بزاف على عينيك وتقدر توصل لأنك ماتبقاش تشوف كاع فبعض الحالات.

ومعا اناهو كايتعتابر لون صيفي ومشرق الا أنه بعض الأبحاث أكدت بلي الناس كاتغضب وكايطلع ليها الدم الا كلسات فشي بيت كلو صفر لمدة طويلة وحتا الدراري الصغار كايزيد البكا ديالهم الا كانو فنفس الوضعية.

من غير هادشي اللون الأصفر عندو إيجابيات فمثلا كايزيد فالطاقة ديالك إذا الا كنتي باغي تجهد فقرايتك ولا تحل شي مشكيل ما عليك غير تحط شي حاجة صفرا حداك هادشي غاينشط التفكير ديالك وغايخليك تبدع أكثر و تلقا حلول المشاكل ديالك.

الا كنتي كاتبغي الصفر عرف راسك انسان فعال وحيوي وأنك قادر على التواصل معا أي واحد وعزيز عليك التحدي وأنك ماكتاخد حتا شي قرار تا كاضرب ليه الحساب. وهاد الأبحاث زادت أكدات بلي هاد النوع ديال الناس زوين أنك تكلس معاهم و يدورو بيك.

بغض النظر على هادشي,هاد اللون كايأثر و يزيد فحالة القلق لأنه كايتعتابر لون سريع الحركة و فهاد الحالة كيتضاعف التفكير التحليلي و كايولي الشخص ناقد أكثر بالنسبة لنفسو و الناس اللي دايرين بيه حتا هوما.